Gondomar

Concello situado na comarca do Val Miñor, moi próximo a Vigo, cidade coa que ten fortes relacións, xa que moita poboación que traballa naquela cidade reside nos concellos dos arredores como Gondomar e se despraza diariamente, factor que inflúe decisivamente na importancia dos movementos pendulares entre o Val Miñor e Vigo.
 

Os usos do solo predominantes son os destinados a labores intensivas, localizadas fundamentalmente no val fértil regado polos ríos Miñor, Groba e Zamáns. Ademais destes aproveitamentos agrícolas o concello posúe ampla superficie industrial na parroquia de Vincios, na que se instalan empresas que aproveitan a proximidade a Vigo para acceder ás boas comunicacións da cidade. A autoestrada do Val Miñor constitúe un eixe importante de transporte para estas empresas localizadas en Gondomar.
 

O concello posúe destacados vestixios arqueolóxicos que o converten no gran xacemento paleolítico provincial grazas á estación de "Chan de Cereixo" en Donas, estación rupestre “Auga da Laxe” en Vincios, as mámoas como a de Chain, petroglifos podomorfos e naviculares como o de Pedra Moura e Castros como o de Xián.